ཉེ་བའི་ལོ་འདི་དག་ལ། མཚོ་བྱང་བོད་རིགས་རང་སྐྱོང་ཁུལ་མདའ་བཞི་རྫོང་མདའ་བཞི་སྡེ་བས་ས་གནས་རང་གི་སློབ་ཆེན་མཐར་ཕྱིན་སློབ་མ་དག་ཕྱིར་ཕ་ཡུལ་དུ་ལོག་པའི་གོ་སྐབས་དམ་འཛིན་བྱས་ཏེ། ཁོ་ཚོར་སྡེ་བའི་ཐོན་ལས་འཕེལ་རྒྱས་ཐད་ནུས་ཤུགས་གང་ཡོད་འདོན་དུ་བཅུག་པ་དང་། སློབ་ཆེན་སློབ་མ་དག་གིས་སྡེ་བའི་རང་བྱུང་ཐོན་ཁུངས་གལ་ཆེན་ཏེ། ཀླུ་ཡུལ་ཆུ་ཁོལ་བཀྲ་ཤིས་རྣམ་རྒྱལ་ཞེས་པའི་ཆུ་ཚན་དེའི་དགེ་མཚན་བེད་སྤྱད་ནས། མང་ཚོགས་ལ་འཚམ་པ་དང་ཡུལ་སྐོར་ལྟད་མོ་བར་འཚམ་པའི་མགྲོན་ཁང་རིགས་སྣ་མང་པོ་ཕྱེས་ཏེ། 2022ལོར་ཡོང་འབབ་སྒོར་ས་ཡ་གཅིག་བཙལ་ལ། ད་ལོར་ཡང་ཆེས་ཉུང་དུས་ཀྱང་ཉིན་རེའི་ཡོང་འབབ་སྒོར་ཉིས་སྟོང་ཡན་ལ་སླེབས་འདུག
ཀླུ་ཡུལ་ཆུ་ཁོལ་བཀྲ་ཤིས་རྣམ་རྒྱལ་ནི་རང་བྱུང་གི་ཆུ་ཚན་དྲོན་མོའི་རིགས་སྟེ། པགས་ནད་དང་རུས་ཚིགས་ཀྱི་ནད་ལ་ཤིན་ཏུ་བཟང་། དེ་བས་ནད་པ་གནས་འདིར་ཆུ་ཁོལ་ལ་འདུག་ཏུ་ཡོང་མཁན་ཤིན་ཏུ་མང་། དེ་བཞིན་མཚོ་སྔོན་པོའི་ཡུལ་སྐོར་ལྗོངས་རྒྱུའི་ལྟ་མོ་པ་དག་ཀྱང་རི་མཐོ་ས་གཙང་གི་གནས་མཆོག་འདི་རུ་དེང་རབས་ལུགས་ཀྱི་མགྲོན་ཁང་ལ་བསྡད་དེ། ཡུལ་སྐོར་གྱི་ཞོར་དུ་ཁམས་གསོ་ཡང་བྱེད་ཐུབ་ཀྱི་ཡོད་པས། ཀུན་གྱིས་དགའ་བསུ་ཚད་མེད་བྱེད་ཀྱིན་འདུག་ལ། གནད་དེར་དམིགས་ནས་སྲིད་གཞུང་གིས་གྲོང་གསེབ་དར་སྤེལ་གྱི་མ་དངུལ་སྒོར་བྱེ་བ་གསུམ་ས་ཡ་གསུམ་ལྷག་བཏང་ནས། མགྲོན་ཁང་དང་ཁམས་གསོ་གཞི་གཅིག་ཅན་གྱི་ལྟེ་གནས་འཛུགས་སྐྲུན་བྱེད་པ་དང་། སྨན་ལུམས་ལ་བསྡད་ན་སྨན་པས་ཆུ་ཁོལ་གྱི་དགེ་མཚན་དེ་ལུགས་མཐུན་གྱིས་བཀོལ་སྤྱོད་བྱེད་པར་ཁྲིད་སྟོན་བྱེད་པའི་འཆར་གཞི་འཐེན་བཞིན་འདུག སྡེ་མི་དཔའ་ཁོས་བཤད་རྒྱུར། 
ང་ཚོ་མདའ་བཞི་སྡེ་བར་མཚོན་ན། ཀླུ་ཡུལ་ཆུ་ཁོལ་བཀྲ་ཤིས་རྣམ་རྒྱལ་ཡོད་པ་དང་། དེ་ཡིན་ན་ཁ་སང་དེ་རིང་སྡེ་བ་སྤྱི་ཡིས་གཉེར་བཞིན་ཡོད་པས། འཛུགས་སྐྲུན་གྱི་སྟེང་ནས་གོང་རིམ་གྱི་རྣམ་གྲངས་མ་དངུལ་འབོར་ཆེན་ཞིག་བཏང་ཡོད་པ་དང་། སྡེ་བས་ཀྱང་འབད་བརྩོན་བྱས་ནས་རང་སྡེ་བའི་ནང་གི་རིག་གནས་ཅན་གྱི་མི་དང་། སློབ་ཆེན་མཐར་ཕྱིན་ནས་ཡོང་བ་དག་རྗེས་སྐྱོང་བྱས་ཏེ་ད་བར་དུ་སྡེ་བའི་ནང་ལས་ཀ་ལས་བཞིན་ཡོད་པའི་རྒྱུ་མཚན་དེ་འདྲ་ཞིག་ཡིན། མ་འོངས་པ་ཡིན་ནའང་། སྡེ་བའི་འཛུགས་སྐྲུན་གྱི་ཐད་ལ་རིག་གནས་ཅན་གྱི་བྱིས་པ་དག་གིས་འབད་བརྩོན་བྱས་ནས་དང་ལེན་བྱས་ན་ཡོང་སྒོའི་ཐད་ནས་ཀྱང་མང་ཚོགས་ལ་དགའ་འོས་པའི་རྣམ་པ་ཞིག་ཡོང་རྒྱུ་རེད།
མདའ་བཞི་སྡེ་བར་ཁྱིམ་ཚང་སུམ་བརྒྱ་དང་བཞི་དང་མི་གྲངས་དགུ་བརྒྱ་ཉེར་བདུན་ཡོད། ཉེ་བའི་ལོ་གཉིས་ཀྱི་ནང་ལ། སྡེ་བའི་སློབ་ཆེན་མཐར་ཕྱིན་སློབ་མ་དག་གིས་ཕ་ཡུལ་ལ་ཤ་ཚ་ཞིང་སྙིང་ཉེ་བའི་སྒོ་ནས་ལས་སྒོ་གསར་སྤེལ་དང་ཐོན་ལས་དར་སྤེལ་ལ་ཤུགས་བསྣན་ནས། མདའ་བཞི་སྡེ་བ་ཞིང་ཆེན་རིམ་པའི་གྲོང་གསེབ་དར་སྤེལ་གྱི་དཔེ་སྟོན་སྡེ་བར་བདམས་འདུག སྡེ་བའི་ཧྲུའུ་ཅི་གཞོན་པ་བསོད་ནམས་རྒྱ་མཚོ་ནི་མཚོ་སྔོན་མི་རིགས་སློབ་ཆེན་ནས་མཐར་ཕྱིན་རྗེས། ཕ་ཡུལ་དུ་ལོག་ནས་ལོ་ལོན་བསམ་ཤེས་དག་གི་རེ་བ་ལྟར། སྡེ་བའི་འཕེལ་རྒྱས་ཀྱི་མདུན་ལྗོངས་ལ་རང་ནུས་ཅི་ལྕོགས་ཀྱིས་བྱས་རྗེས་འཇོག་པར་འབད་པའི་ན་གཞོན་ཡ་རབས་ནུས་ལྡན་ཞིག་རེད། ཁོས་གསར་འགོད་པར་བཤད་རྒྱུར།
སློབ་ཆེན་མཐར་ཕྱིན་ནས་ཕྱིར་ཕ་ཡུལ་ལ་ཐོན་པ་དང་། གྲོང་གསེབ་དར་སྤེལ་གྱི་སྲིད་ཇུས་ལག་བསྟར་བྱེད་པ་དེ་སྐབས་ཐོག་གཅིག་ཏུ་འཁེལ་ཡོད་ཅིང་། ང་ཚོ་སྡེ་བར་མཚོན་ན། སྡེ་བ་གཞན་དང་བསྡུར་ན། ཁྱད་པར་ཅན་ཞིག་ཡིན་ནོ། ཀླུའི་ཆུ་མིག་ལྗོངས་ཁུལ་འདི་ཡོད་པ་རེད། དེ་ཡིན་ན་ཐོན་ཁུངས་ཁྱད་པར་བ་ཞིག་རེད། འདིའི་ཐོན་ཁུངས་དང་བརྟེན་ཞིང་འབྲེལ་བ་བྱས་ཏེ། རང་སྡེའི་ནང་ནས་ཕྱིར་ཕ་ཡུལ་ལ་ལོག་པའི་སློབ་ཆེན་སློབ་མ་དང་ཕ་ཡུལ་གྱི་ན་གཞོན་སོགས་ཕྱོགས་གཅིག་ཏུ་འབྲེལ་བ་དང་། ན་གཞོན་གྱི་ཚོང་ལས་མཐུན་ཚོགས་བཙུགས་ཏེ། ང་ཚོ་སྡེ་བའི་ཐོན་ཁུངས་བེད་སྤྱོད་བྱས་པ་དེ་ཡིས་སྔར་ལས་ལྷག་པའི་སྒོ་ནས་སྡེ་བའི་ཡོང་སྒོ་དང་ཕྱོགས་གང་གི་ཐད་ཀྱང་བྱ་བ་སྔར་ལས་མང་པོ་ཞིག་བསྒྲུབས་ཡོད།
སྡེ་བ་འདིས་རང་བྱུང་ཆུ་ཚན་དེ་མགྲོན་ཁང་རེ་རེའི་ཁྲུས་ཁང་དུ་དྲངས་ཡོད་པ་མ་ཟད། ཁེར་ཐོག་ཏུ་སྤྱི་པའི་ཁྲུས་ཁང་འཛུགས་སྐྲུན་བྱས་ཤིང་།དེའི་ནང་ཁྲུས་རྫིང་ཆེན་མོ་གཅིག་དང་ཁྱད་ལྡན་ཁྲུས་ཁང་ཆུང་ངུ་དྲུག་ལས་ཡོད་ལ། ཁྲུས་ཁང་འགྲམ་དུ་རྒྱ་སེ་མེ་ཏོག་དང་འོ་མ། རྒུན་ཆང་སོགས་ཀྱང་གྲ་སྒྲིག་བྱས་འདུག་པས། ཡུལ་སྐོར་པ་རྣམས་ཀྱིས་ཁམས་གསོ་དང་སྤྲོ་སྐྱིད་ཀྱི་ལོངས་སྤྱོད་མཉམ་རོལ་བྱས་ཆོག་པའི་མཐུན་རྐྱེན་གང་མང་བསྐྲུན་འདུག མགྲོན་ཁང་གི་ལས་བཟོ་པ་ཕག་མོ་ཆོས་མཚོས་བཤད་རྒྱུར།
ན་ནིང་སློབ་གྲྭ་ནས་མཐར་ཕྱིར་རྗེས། ཕྱིར་རང་གི་སྡེ་བར་ཡོང་ནས་ལས་རིགས་འདི་ལ་ཤུགས་བརྒྱབ་པ་དང་། རང་སྡེ་བའི་ནང་གི་ནོར་གནག་གི་ཁྱད་ལྡན་ཐོན་རྫས་སོགས་ནང་ལོག་ཏུ་ཁྱབ་བསྒྲགས་ཀྱི་ནུས་པ་ཞིག་ཨེ་ཐོན་དང་མང་ཚོགས་ཀྱི་དཔལ་འབྱོར་ཇེ་རྒྱས་ཇེ་ལེགས་སུ་ཨེ་འགྲོ་བསམ་ནས་འདིའི་ཕྱོགས་ཀྱི་ཁེ་ལས་ལ་ཤུགས་རྒྱག་བསམ་བཞིན་ཡོད།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རྒྱལ་ཡོངས་ཀྱི་ཡུལ་སྐོར་འཕེལ་རྒྱས་བྱ་བའི་གྲོས་ཚོགས་སྟེང་། དེང་རབས་ཡུལ་སྐོར་ལས་རིགས་ཀྱི་མ་ལག་འཐུས་ཚང་དུ་བཏང་ནས། གང་མགྱོགས་སྒོས་ཡུལ་སྐོར་སྟོབས་ལྡན་རྒྱལ་ཁབ་འཛུགས་སྐྲུན་བྱེད་དགོས་ཞེས་གསུངས་པ་ལྟར། མདའ་བཞི་སྡེ་བས་ཕྱུགས་ལས་དང་ཡུལ་སྐོར་ཟུང་འབྲེལ་བྱས་ཤིང་། སྡེ་བའི་རིག་གནས་པ་དག་ལ་རང་བྱུང་ཐོན་ཁུངས་དགེ་མཚན་སྤྱད་ནས་ཐོན་ལས་དར་སྤེལ་བྱེད་དུ་བཅུག་པ་དང་། མཐོ་སྒང་གི་ཆུ་ཚན་ཁམས་གསོའི་གྲོང་རྡལ་གྱི་རིམ་པ་བཞི་པའི་ལྗོངས་ཁུལ་འཛུགས་སྐྲུན་བྱས་ཏེ། ཚད་རིམ་མཐོ་བའི་དེང་རབས་ཞབས་ཞུའི་འཕེལ་རྒྱས་ཁ་ཕྱོགས་རྒྱུན་འཁྱོངས་དང་། བོད་ལུགས་གསོ་རིག་མྱོང་རོལ་ཁང་དང་ལུས་པོ་བཀྲུ་ས། མགྲོན་ཁང་བཅས་གཞི་གཅིག་ཅན་གྱི་ཡུལ་སྐོར་ཐོན་ལས་མུ་ཁྱུད་འཛུགས་སྐྲུན་བྱས་ཏེ། མདའ་བཞི་སྡེ་བ་འབྱོར་ཕྱུག་དཔལ་ལ་རོལ་བའི་ཕྱོགས་སུ་བསྐྱོད་པར་འབད་བཞིན་མཆིས།
གསར་འགོད་པ། སྐལ་བཟང་རྣམ་རྒྱལ། ཚེ་རིང་སྒྲོལ་མ།
རྩོམ་སྒྲིག་འགན་འཁུར་བ། བསོད་ནམས་ཚེ་རིང་། གཡང་འབུམ་རྒྱལ།
ལྟ་སྐུལ་བ། ཕྱུག་ལོ།
སྤྱི་ཁྱབ་ལྟ་སྐུལ་བ། དབང་གྲགས་ཚེ་རིང་།
