ཞིང་ཆེན་དམངས་ཆེན་གྱི་འཐུས་མི། མཚོ་ནུབ་སོག་རིགས་བོད་རིགས་རང་སྐྱོང་ཁུལ་མི་དམངས་སྨན་ཁང་གི་སྨན་བཅོས་སྤུས་ཚད་ཚོད་འཛིན་ཚན་ཁག་གི་ཚན་གཙོ། སྨན་པ་འབུམ་རམས་པ་ལིས་ཧྥང་གིས་བཤད་རྒྱུར།
ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པས“སྨན་གསུམ”མཐུན་སྦྱོར་ངང་འཕེལ་རྒྱས་གཏོང་རྒྱུ་གསལ་པོར་བཏོན་ཡོད། 2025ལོ་ནི་ཕྱོགས་ཡོངས་ནས་བཅོས་སྒྱུར་སྔར་ལས་གཏིང་ཟབ་ཏུ་གཏོང་བའི་འགག་རྩའི་ལོ་ཞིག་ཡིན་པས། ང་ཚོས་སྨན་རྫས་འཕྲོད་བསྟེན་སྒྲིག་སྲོལ་བཅོས་སྒྱུར་གཏིང་ཟབ་ཏུ་གཏོང་བ་དང་མི་དམངས་ཀྱི་བདེ་ཐང་ལ་སྲུང་སྐྱོབ་བྱེད་པའི་འགན་འཁྲི་དང་ལས་འགན་གྱི་འདུ་ཤེས་སྔར་ལས་ཆེ་རུ་གཏོང་བ། སྤུས་ལེགས་སྨན་བཅོས་ཐོན་ཁུངས་ཀྱི་ཤོང་ཚད་ཇེ་ཆེར་གཏོང་བ་དང་ས་ཁོངས་དོ་སྙོམས་བཀོད་སྒྲིག་ལ་སྐུལ་འདེད་གཏོང་བའི་ཐད་འབད་བརྩོན་ཤུགས་ཆེན་བྱས་ཏེ། གཞི་རིམ་གྱི་སྨན་བཅོས་འཕྲོད་བསྟེན་ཞབས་ཞུར་ཤུགས་སྣོན་པ་དང་། སེམས་ཤུགས་དང་བརྩེ་སེམས་ལ་བརྟེན་ནས་སྨན་བཅོས་ཐོན་ཁུངས་དང་ཞབས་ཞུ་ཡིས་མི་སྔར་ལས་མང་པོར་ཕན་པ་ཐོབ་དུ་འཇུག་པ། མི་དམངས་མང་ཚོགས་ཀྱི་སྨན་བཅོས་ཐད་ཀྱི་ཐོབ་སྣང་དང་སྐྱིད་སྣང་། བདེ་སྣང་བཅས་མཐོ་རུ་གཏོང་གང་ཐུབ་བྱ་རྒྱུ་ཡིན།
ཞིང་ཆེན་དམངས་ཆེན་གྱི་འཐུས་མི། མཚོ་ཤར་གྲོང་ཁྱེར་ཧུའུ་ཀྲུའུ་ཧོར་རིགས་རང་སྐྱོང་རྫོང་མཐོ་སྒང་ཁྱད་ལྡན་དེང་རབས་ཞིང་ལས་དཔེ་སྟོན་གླིང་དོ་དམ་ཨུ་ཡོན་ལྷན་ཁང་གི་ལས་བཟོ་བ་ཆི་ཝེ་ཧྲིག་གིས་བཤད་རྒྱུར།
ཉེ་བའི་ལོ་འགའི་རིང་། ཧུའུ་ཀྲུའུ་རྫོང་གིས་ཞིང་ཆེན་ཡོངས་ཀྱི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་བསྐྲུན་པའི་འཐབ་ཇུས་ནང་རང་འགུལ་ངང་མཉམ་འདྲེས་བྱས་ཏེ། མཐོ་སྒང་གི་ཁྱད་ཆོས་ལྡན་པའི་ས་བོན་ལས་རིགས་དར་སྤེལ་གཏོང་བའི་བྱ་སྤྱོད་མགྱོགས་མྱུར་སྒོས་ལག་བསྟར་བྱས་ནས་དགའ་འོས་པའི་གྲུབ་འབྲས་ཐོབ་ཡོད། ང་ཚོས་བཅོས་སྒྱུར་གྱི་བསམ་གཞིགས་རྒྱུན་འཁྱོངས་བྱས་ནས། འདུ་ཤེས་གསར་པ་ཁ་ཕྱོགས་སུ་འཛིན་པ་དང་། ལག་རྩལ་གསར་པ་མཚམས་སྦྱོར་བྱེད་པ། ཐོན་རྫས་གསར་པ་ལྟེ་བར་བཟུང་ནས་ཞིང་ལས་འཕེལ་རྒྱས་གཏོང་སྟངས་བསྒྱུར་བ་དང་། ཞིང་ལས་འཕེལ་རྒྱས་ཀྱི་སྤུས་ཚད་མཐོ་རུ་གཏོང་བ། ཞིང་ལས་ཐོན་རྫས་ཀྱི་གཞི་ཁྱོན་ཆེ་རུ་གཏོང་བ་དང་ཐོན་རྫས་གསར་པ་བསྐྲུན་པ། སྤུས་ཚད་མཐོར་འདེགས་གཏོང་བ་བཅས་ལ་རྒྱུན་ཆད་མེད་པར་སྐུལ་འདེད་བཏང་སྟེ། ཞིང་ལས་ཀྱི་ཕན་འབྲས་འཕར་སྣོན་དང་ཞིང་པའི་ཡོང་འབབ་འཕར་སྣོན་ཡོང་བར་སྐུལ་འདེད་བཏང་ནས། ཕྱོགས་ཡོངས་ནས་རྒྱལ་ཁབ་ཀྱི་དེང་རབས་ཞིང་ལས་ཐོན་ལས་གླིང་འཛུགས་སྐྲུན་བྱེད་ཤུགས་ཇེ་མགྱོགས་སུ་གཏོང་རྒྱུ་ཡིན།
ཞིང་ཆེན་དམངས་ཆེན་གྱི་འཐུས་མི། ཟི་ལིང་གྲོང་ཁྱེར་མཁར་བྱང་ཆུའུ་ཏ་པའོ་ཙི་གྲོང་རྡལ་ཐའོ་པེ་སྡེ་བའི་སྤྱི་ཁྱབ་ཏང་ཀྲི་པུའུ་ཧྲུའུ་ཅི་ཁྲིན་ཅུན་ལེང་གིས་བཤད་རྒྱུར།
བཅོས་སྒྱུར་གཏིང་ཟབ་ཏུ་གཏོང་རྒྱུ་ནི་གྲོང་གསེབ་དར་སྤེལ་ལ་སྐུལ་འདེད་གཏོང་བའི་ཐབས་ཤེས་གལ་ཆེན་ཞིག་ཡིན། ན་ནིང་ང་ཚོ་མཁར་བྱང་ཆུའུ་ཏང་ཨུ་དང་ཆུའུ་སྲིད་གཞུང་གིས་རིག་གནས་ཡུལ་སྐོར་སྟོབས་ཆེའི་ཁུལ་གྱི་མཁར་བྱང་གི་རིག་གནས་ཡུལ་སྐོར་ཟོང་རྟགས་བསྐྲུན་པའི་བསམ་ཕྱོགས་གཞིར་བཟུང་ནས། གྲོང་གསེབ་དར་སྤེལ་གྱི་སྤྲོ་སྣང་ལྡན་པའི་ཞིང་ལས་འཕེལ་རྒྱས་ཀྱི་ཐབས་ལམ་གསར་པ་འཚོལ་ཞིབ་ཧུར་ཐག་བྱས་ཏེ། ཐའོ་པེ་མེ་ཏོག་གི་རྒྱ་མཚོའི་གྲོང་གསེབ་ཡུལ་སྐོར་ལས་རིགས་གསར་པ་བཏོད་ནས་ཡོང་འབབ་འཕར་སྣོན་བྱེད་པ་དང་ཆབས་ཅིག་འཕེལ་རྒྱས་ཀྱི་ཡིད་ཆེས་ཆེ་རུ་ཕྱིན་ཡོད། རྗེས་ཕྱོགས་ང་ཚོས་བསམ་འཆར་བསྡུ་ལེན་རྒྱ་ཆེར་བྱས་ཏེ་ཧུར་ཐག་གིས་གྲོང་གསེབ་འཕེལ་རྒྱས་ཀྱི་ལམ་བུ་གསར་པ་སྔར་ལས་མང་པོ་བཙལ་་ནས། སྡེ་བའི་ཐུན་མོང་དཔལ་འབྱོར་འཕེལ་རྒྱས་ཀྱི་ཐད་ཐོལ་བརྒལ་གསར་པ་ཡོང་བར་སྐུལ་འདེད་གཏོང་རྒྱུ་ཡིན།
ཤ་བོ་རིན་མཚོས་བསྒྱུར།
